Հրաչ Բերբերյան. «Անասնագլխաքանակի շեշտակի անկում է գրանցվել». «Փաստ»

«Փաստ» օրաթերթը գրում է.

Հանրապետությունում այս տարի անասնագլխաքանակի շեշտակի անկում է գրանցվել: Ամփոփելով անասնապահության ոլորտը՝ «Փաստ» օրաթերթի թղթակցի հետ զրույցում տեղեկացրեց Ագրարագյուղացիական միավորում ՀԿ նախագահ Հրաչ Բերբերյանը:

«Դեռ ամռանը՝ օգոստոսին, գյուղատնտեսության նախարարությունն էլ հայտարարեց, որ մոտ 40000 գլխաքանակի անկում կա: Կարծում եմ, որ այդ տենդենցը կշարունակվի նաև մինչև հաջորդ տարվա կեսերը, քանի որ անասնակերի պակաս կա: Երաշտի պատճառով անասնակերն այս տարի պակաս էր, սա էլ իր հերթին կբերի մսի արժեքի բարձրացմանը: Գարնան կողմ մսի կիլոգրամի արժեքը 4500–5000 դրամի կհասնի»,– ասաց նա:

Մանր եղջերավոր կենդանիների դեպքում, ըստ նրա, իրավիճակն ավելի կայուն է, բայց քայլեր պետք է տարվեն գլխաքանակն ավելացնելու ուղղությամբ:

«Ոչխարաբուծությունը շուտ վերականգնելի ոլորտ է, մենք ունենք մեր արտահանման շուկան և կարելի է գլխաքանակն ավելացնել: Որոշ մարդիկ ասացին, իբրև մայրական հոտն էլ է արտահանվում, բայց այդպիսի վտանգ չի եղել»,– հայտնեց Բերբերյանը:

Բուսաբուծության ոլորտում էլ ցուցանիշները գոհացուցիչ չեն: Արարատյան դաշտը կարկուտից տուժեց, ինչն էլ ազդեց բերքատվության վրա:

« Եթե գնագոյացմանն ենք նայում, ապա նախորդ տարվա համեմատ գները չնվազեցին: Ծիրանի, դեղձի բերքը ցածր էր: Ասել, որ մենք այսօր լուրջ հաջողություններ ունենք գյուղատնտեսությունում, սխալ է: Վարչապետն էլ ասաց, որ 20–30% անկում ենք ունեցել: Եթե բարձր ցուցանիշի մասին խոսեն, ուրեմն՝ թվանկարչություն են անում, ո՞ւմ համար են այդ թվերը նկարում, չեմ հասկանում»,– նշեց մեր զրուցակիցը:

Այս տարի մի քանի մարզերում կարկտահարություն տեղի ունեցավ: Արմավիրի մարզում 20 համայնք տուժեց, որից 10–ը լուրջ վնասներ են կրել: Մի կողմից էլ երաշտն իր սև գործը կատարեց:

«Շոգերի պատճառով բերքի լուրջ կորուստ արձանագրվեց: Մյուս կողմից էլ ոռոգման ջուր չկար: Հասան այն բանին, որ Սևանից ջուր բաց թողեցին և ասացին, թե այդ ջրով ամբողջ Հոկտեմբերյանի տարածաշրջանը ջրով կապահովեն: Բայց, թե որ ջրանցքով այդ ջուրը պետք է տանեին, իրենք էլ տեղյակ չէին ու այդպես էլ ջուր չունեցան գյուղացիները»,– շարունակեց Ագրարագյուղացիական միավորման նախագահը:

Բերբերյանի խոսքով՝ տարիներ շարունակ գյուղատնտեսության ոլորտում բերքատվության ցուցանիշները նկարված են եղել:

«Թվերից խոսելն արդեն աբսուրդ է, այդ թվերը մառազմ են, որոնք քննարկման իմաստ չունեն: Եթե ուզում ենք ինչ–որ բանի հասնել, պետք է մեր երկրի իրական պատկերն ունենանք, իսկ այդ պատկերը կտա միայն գյուղմթերք արտադրողը, ոչ թե մարզպետարանում նստած ձրիակերը: Իրենց «լավագույն» աշխատանքով թվեր են ներկայացնում: Սերժ Սարգսյանի նկատողությունից հետո էլ պետք է թվեր նկարե՞ն»,– հարց բարձրացրեց նա:

Հրաչ Բերբերյանը մատնանշեց, որ կարկուտից տուժած գյուղացին այդպես էլ պետությունից որևէ օգնություն չստացավ: Նրա կարծիքով՝ այստեղ լուրջ բարեփոխման կարիք կա:

«Եթե ուզում ենք գյուղմթերքը մրցունակ լինի, պետք է և՛ ջերմոցային տնտեսության ոլորտում սուբսիդավորում իրականացվի, և՛ մյուս ճյուղերում: Ճգնաժամի հաղթահարման ծրագիր պետք է մշակվի և դրանով գյուղատնտեսությունը առաջ տանեն»,– ասաց նա:

Ոլորտում հաջողության հասնելու հույսը Բերբերյանը պրոֆեսիոնալ կադրերի հետ է կապում, ինչի պակասն այսօր կա:

«Մեզ պետք են լրջագույն մարդիկ, ովքեր այս բնագավառում բանիմաց են և կդառնանք լավ երկիր: Իսկ այօր թատերական դիպլոմով մարդիկ նախարարությունում են աշխատում»,– եզրափակեց Հրաչ Բերբերյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»