ԱԱԾ–ի հայտարարության հետքերով. «Փաստ»

«Փաստ» օրաթերթը գրում է.

Երեկ, ողջ տեղեկատվական համակարգերը ցնցած ԱԱԾ–ի հայտարարությունը, թե ազգությամբ հայ, ԱՄՆ քաղաքացի Ռ. Ք.–ն 2017 թվականի սեպտեմբերին Ֆեյսբուք սոցիալական ցանցում գրանցել է «Martin Avagyan» օգտատիրոջ կեղծ տվյալներով անհատական էջ, որի միջոցով հրապարակել է նյութեր` «Մարտիկներ հանուն արդարության» անվանմամբ խմբավորում ձևավորելու, խմբավորման գործունեության մարտավարության, դրա անդամների կարգապահության, անվտանգության և գաղտնապահության կանոնների մասին:

ԱԱԾ–ի ուսումնասիրությունների համաձայն, Ռ. Ք.–ն ՀՀ–ում իրավիճակն ապակայունացնելու, բնակչությանն ահաբեկելու, վախի մթնոլորտ ձևավորելու, պետական իշխանության մարմինների վրա ապօրինի ճնշում գործադրելու նպատակով ՀՀ իրավապահ մարմինների, ինչպես նաև այլ պաշտոնատար անձանց մահվան կամ ծանր մարմնական վնասվածքներ պատճառելուն, նշված հետևանքների իրական սպառնալիքներ ստեղծելուն ուղղված հրկիզումներ, պայթյուններ և հանրավտանգ այլ գործողություններ իրականացնելու համար մարդկանց հավաքագրելով փորձել է ստեղծել հանցավոր համագործակցություն՝ դրան մասնակից դարձնելով ինչպես Հայաստանում, այնպես էլ դրա սահմաններից դուրս բնակվող ազգությամբ հայ քաղաքացիների: Բացի այդ, ձեռք բերված ապացույցներով հիմնավորվել է, որ նույն անձը խորհուրդներով, ցուցումներով, ինչպես նաև միջոցներ տրամադրելով նախապատրաստել է հանցակիցների միջոցով ՀՀ տարածքում ահաբեկչական գործողությունների իրականացում:

Դեպքի առթիվ ԱԱԾ քննչական վարչությունում հարուցված քրեական գործի նախաքննության ընթացքում ձեռք բերված ապացույցների հիման վրա որոշում է կայացվել նշված անձի կողմից կատարված ենթադրյալ հանցագործության՝ հանցավոր համագործակցություն ստեղծելու փորձի և ահաբեկչության նախապատրաստության համար ՀՀ քրեական օրենսգրքի մի քանի հոդվածներով նրան որպես մեղադրյալ ներգրավելու մասին: Դատարանի որոշմամբ նրա նկատմամբ կալանավորումը որպես խափանման միջոց կիրառելու մասին որոշում է կայացվել և հայտարարվել է հետախուզում:

Բացի այդ, ձեռնարկվում են միջոցներ ՀՀ–ում գտնվող Ռ. Ք.–ի հանցակիցներին պարզելու և հայտնաբերելու ուղղությամբ:

ԱԱԾ–ի տարածած այս լուրը բավականին հետաքրքիր էր և «Փաստի» թղթակիցը փորձեց սեփական ուսումնասիրություն իրականացնել, պարզելու, թե նշված կազմակերպությանն առհասարակ ովքեր են անդամակցում:

Ի զարմանս մեզ, ֆեյսբուքյան օգտատիրոջ ընկերների մեջ գտանք հասարակության շրջանում բավականին հայտնի հոգեբույժ Հարություն Մինասյանի անունը: Առաջին հայացքից զարմանալի այս «հայտնագործության» կողքով անտարբեր անցնել չկարողացանք և անմիջապես նրանից փորձեցինք պարզել, թե ինքն արդյո՞ք տեղյակ է, որ «անդամակցում» է կեղծանունով գրանցված օգտատիրոջ «հիմնած» կազմակերպությանը, որտեղ պարբերաբար բռնությունների կոչեր են հնչեցվում:

Հ. Մինասյանը «Փաստի» թղթակցի հետ զրույցում նշեց, որ ինքը սոցիալական ցանցում 5000 օգտատեր ընկերներ ունի, բայց ոչ բոլորին է ճանաչում: Բացի այդ, ժամանակի սղության պատճառով չի կարող բոլորի գրառումներին հետևել: Ինչ վերաբերում է նշված կազմակերպության անունից հրապարակվող բռնության կոչերին, ապա նա վստահեցրեց, որ իր աչքով նախկինում երբևէ նման հայտարարություններ չեն ընկել:

«Ես քանի որ հոդվածներ եմ գրում, Ֆեյսբուք սոցիալական ցանցն ինձ համար ազատ տիրույթ է, որտեղ բժշկական թեմաներով իմ հոդվածներն եմ տեղադրում, որպեսզի մարդիկ կարդան: Եվ մարդկանց քաղաքական կողմնորոշումները ինձ չեն հետաքրքրում: Ի միջիայլոց, ես փորձում եմ նրան իմ ընկերների միջից հանել, բայց ոչ մի կերպ չի ստացվում: Ինչ վերաբերում է կոչերին, ապա սոցիալական ցանցերում հազար տեսակ բաներ են գրում, բայց դա ազատ տարածք է, ով ինչ ուզում՝ գրում է, ով է նման բաները նկատում: Բայց ինչպե՞ս մարդը նախօրոք իմանա, թե ով է իրեն ընկերության առաջարկ ուղարկում, որ հաստատի,կամ մերժի: Ես անկախ իմ կամքից եմ հայտնվել այդ խմբում: Անվտանգության ծառայություն ունենք, թող նման մարդկանց հայտնաբերեն, բռնեն՝ դատեն, դա հո իմ ու քո գո՞րծը չի»,– ասաց Հ. Մինասյանը:

Նա նաև նշեց, որ մարդիկ, ովքեր արտասահմանում են ապրում ու իրենց դրսում ապահով են զգում, նրանք էլ են նման բաներ գրում երկրի նախագահի ու մյուսների հասցեին: Նման գրառումներ կատարողներին նա արգելափակում է, բայց այս մեկի մասին նոր է իմացել:

«Եթե ինձ հարցնեն ինչու եմ այդ օգտատիրոջ հետ ընկերացել, կասեմ այն, ինչ ձեզ ասացի, բայց հո իրենց կողմից ինձ նման մարդկանց ցուցակների մեջ մտցնելով չի: Դա հո չի նշանակում, որ մենք դառնանք տեռորիստ: Մարդիկ էլ պետք է զգույշ լինեն, որ ակամայից նման մարդկանց խմբերում չընդգրկվեն, որովհետև այդպիսի մարդիկ համացանցում շատ–շատ են»,– ասաց Հ. Մինասյանը: Ի դեպ, նշված օգտատիրոջ ընկերների ցանկում էր նաև Պետրոս Մակեյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»