Արտասահմանյան ընկերությունը կզբաղվի Հայաստանի փիառով. «Փաստ»

«Փաստ» օրաթերթը գրում է.

Օրեր առաջ Տնտեսական զարգացման և ներդրումների նախարար Սուրեն Կարայանն ընդունել էր «M&C SAATCHI» մարքեթինգային ընկերության տնօրեն Անիլ Բեդիին, ով այստեղ էր Հայաստանի զբոսաշրջության զարգացման հիմնադրամի և Զբոսաշրջության պետական կոմիտեի հրավերով։

Հանդիպման նպատակը՝ Հայաստանի ճանաչելիության բարձրացման ուղիները, ծագող խնդիրները և դրանց լուծման եղանակները պարզելն էր։ Ի դեպ, այդ հանդիպման ընթացքում Անիլ Բեդինը կիսվել էր նշված ոլորտում իրենց կազմակերպության ունեցած փորձով։ Հանդիպման ավարտին պայմանավորվածություն էր ձեռք բերվել շարունակել համագործակցությունը Հայաստանի զբոսաշրջության պատասխանատու մարմինների հետ։

Նշենք, որ «M&C SAATCHI» ընկերությունը հայտնի կրեատիվ մարքեթինգային ընկերություն է, որը համագործակցել է աշխարհի մի շարք երկրների հետ՝ նրանց ճանաչելիությունը բարձրացնելու ուղղությամբ։ Ընկերության գործունեության ուղղություններից է երկրների ճանաչելիության բարձրացումը, տնտեսական աճի խթանումը և զբոսաշրջային այցելությունների թվի աճը։

Զբոսաշրջության պետական կոմիտեի նախագահ Զարմինե Զեյթունցյանի կարծիքով՝ զբոսաշրջության ոլորտի քաղաքականության մեջ կարևորագույն վեկտորներից մեկն ուղղված է Հայաստանի՝ համաշխարհային շուկայում ճանաչելիության բարձրացմանը: Նա շեշտում է, որ ամբողջ աշխարհն այսօր բավական մեծ ուշադրություն է դարձնում երկրի PR–ին ու մարքեթինգին՝ այդ նպատակով ներգրավելով նաև միջազգային հեղինակավոր մասնագիտացված կազմակերպությունների:

««M&C SAATCHI»» ընկերությունը գրասենյակներ ունի ավելի քան 40 երկրներում: ՀՀ Զբոսաշրջության պետական կոմիտեն և Հայաստանի զբոսաշրջության զարգացման հիմնադրամը դիմել են այս ընկերությանը, որն առաջարկել է որպես առաջին փուլ Հայաստանի համար մշակել, այնուհետև իրականացնել թվային և PR արշավ մեր կողմից ընտրված որևէ շուկայում»,– նշեց նա մեզ հետ զրույցում:

Ընկերությանը առաջարկվել է PR արշավ իրականացնել Հայաստանին ամենամոտ ու գրավիչ շուկայում, որը Ռուսաստանի Դաշնությունն է: Ըստ Զեյթունցյանի՝ այս ընկերությունը նմանատիպ աշխատանքների մեծ փորձ ունի՝ մասնավորապես 10 տարի աշխատում է Վրաստանի հետ: Մեր զրուցակցի խոսքով՝ Վրաստանի կողմից գրանցված նվաճումների մի մասն էլ «M&C SAATCHI»–ի աշխատանքի արդյունքն է:

«Համաշխարհային շուկայում Հայաստանի պատշաճ PR–մարքեթինգային քաղաքականության իրականացման, երկրի կայուն տնտեսական զարգացման նպատակով կազմակերպվել է կազմակերպության հանդիպումը վարչապետ Կարեն Կարապետյանի մոտ, որի ժամանակ վարչապետին է ներկայացվել համաշխարհային շուկայում Հայաստանի դիրքավորմանը, PR–ին ու մարքեթինգին, միջազգային հեղինակության ու հարգանքի ամրապնդմանն ու զարգացմանը վերաբերող նախագիծը: Պատրաստվում ենք հարցը քննարկել նաև մասնավոր հատվածի, Ռազմավարական նախաձեռնությունների կենտրոնի ու Հայաստանի զարգացման հիմնադրամի ներկայացուցիչների հետ»,– հավելել է նա:

 Շարունակությունը՝ «Փաստ» օրաթերթի այսօրվա համարում