Հանրային կոչ՝ կոտրել այս լռության շղթան. «100 հայ կանայք» նախաձեռնություն

ԲԱՑ ՀԱՅՏԱՐԱՐՈՒԹՅՈՒՆ

«100 ՀԱՅ ԿԱՆԱՅՔ» ՆԱԽԱՁԵՌՆՈՒԹՅԱՆ ԿՈՂՄԻՑ

ԵՐԲ ԴԻՎԱՆԱԳԻՏՈՒԹՅՈՒՆԸ ԼՌՈՒՄ Է, ՔԱՂԱՔԱՑԻԱԿԱՆ ՊԱՐՏՔԸ ՊԱՀԱՆՋՈՒՄ Է ԲԱՐՁՐԱՁԱՅՆՈՒՄ․

ՀԱՆՐԱՅԻՆ ԿՈՉ ՀԱՅԱՍՏԱՆՈՒՄ ԻՐԱՎՈՒՆՔԻ ՓԼՈՒԶՄԱՆ ԵՎ ՄԻՋԱԶԳԱՅԻՆ ՀԱՆՐՈՒԹՅԱՆ ԼՌԵԼՅԱՅՆ ՀԱՄԱՁԱՅՆՈՒԹՅԱՆ ՄԱՍԻՆ

Մեկ շաբաթ առաջ «100 հայ կանայք» նախաձեռնությունը, որի կազմում ընդգրկված են գիտնականներ, մշակույթի գործիչներ, ձեռներեցներ, տարբեր ոլորտների և քաղաքացիական առաջնորդներ, հրատապ դիմում-բողոք հղեց Հայաստանում հավատարմագրված օտարերկրյա դիվանագիտական առաքելություններին և միջազգային կառույցներին, այդ թվում՝ ԱՄՆ դեսպանատանը, ԵՄ պատվիրակությանը, ՄԱԿ-ին, Եվրոպայի խորհրդին, ՄԹ դեսպանատանը, ԵՄ բարձրաստիճան ներկայացուցիչներին, ԵՄ բոլոր երկրների դեսպանատներին և այլ կազմակերպությունների։

• Դիմումը մանրամասն ներկայացնում էր Հայաստանում օրեցօր խորացող մտահոգիչ իրականությունը, մասնավորապես.

Դատական իշխանության ամբողջական ենթարկումը գործադիրին,

Քաղաքական և քաղաքացիական ընդդիմախոսների, այդ թվում՝ կին առաջնորդների, թիրախավորված քրեական հետապնդումներն ու երկարատև, կամայական կալանավորումները,

Ոստիկանական ուժի ապօրինի կիրառումը և պետական մակարդակով ճնշումների անհավանական աճը,

Սեփականության իրավունքի հակասահմանադրական ոտնահարումները, ընկերությունների փաստացի խլումն ու զանգվածային տնտեսական ռեպրեսիաները ընդդիմախոսների նկատմամբ։

Նախաձեռնության մասնակիցներին պետական հետապնդումներից, կամայական ձերբակալություններից և մասնագիտական ճնշումներից պաշտպանելու նպատակով մենք սկզբնապես դիմել էինք բոլորի կազմակերպություններին գաղտնիության պահպանման պայմանով, սակայն՝

Միջազգային հանրության յոթօրյա քար լռությունը

Դիմումն ուղարկելուց հետո անցել է յոթ օր․ Յոթ օր շարունակվող դատական ապօրինությունների, կամայական կալանքների և քաղաքացիական իրավունքների ոտնահարման պայմաններում այն միջազգային կառույցներն ու դիվանագիտական ներկայացուցիչները, որոնք իրենց հռչակել են ժողովրդավարության և իրավունքի գերակայության պահապաններ, պահպանում են խլացուցիչ լռություն։

Այս պասիվությունը չեզոքություն չէ. սա դիվանագիտական հարմարվողականության դրսևորում է, որը լեգիտիմացնում է Հայաստանում պետական ապօրինությունները և բացարձակ անպատժելիության ազդակ հղում գործադիր իշխանությանը։

Այսօր մենք մերժում ենք այդ լռությունը և մեր հավաքական խոսքը ներկայացնում ենք հանրությանը։

Մենք դիմում ենք այս քայլին՝ լիովին գիտակցելով սպառնացող անձնական, իրավական և մասնագիտական լուրջ ռիսկերը։ Այնուամենայնիվ, երբ գաղտնիությունը ծառայում է լոկ պետական ապօրինությունները միջազգային հանրության աչքից հեռու պահելուն, անանունությունն դառնում է անընդունելի զիջում։

Հայտարարում ենք ամենայն պատասխանատվությամբ. եթե սույն հայտարարությունից հետո սույն նախաձեռնության որևէ մասնակից ենթարկվի պետական ռեպրեսիաների, կամայական հետապնդման կամ մասնագիտական ճնշումների,

պատասխանատվությունը կրելու է նաև միջազգային հանրությունը, որի լռությունը հնարավոր է դարձնում այս ապօրինությունները ՀՀ պետական մակարդակով։

Մեր Պահանջը

Մենք կոչ ենք անում միջազգային գործընկերներին, հավատարմագրված դեսպաններին և բազմակողմ կառույցներին.

Հրապարակայնորեն կոտրել այս լռության շղթան. Տալ հստակ և օբյեկտիվ գնահատական դատական իշխանության անկախության կորստին, կալանքը որպես պատժիչ գործիք կիրառելու պրակտիկային և քաղաքական ու քաղաքացիական ընդդիմախոսներին ու հանրային ձայները թիրախավորելու պետական քաղաքականությանը։

Պաշտոնապես արձագանքել քաղ հասարակության կողմից ներկայացվա դիմումներին. Դադարեցնել քաղաքացիական հասարակության հրատապ ահազանգերը լռելայն արխիվացնելու գործելաոճը և ձևավորել հաշվետու, թափանցիկ երկխոսություն անկախ քաղ հասարակության հետ։

Միջազգային ցանկացած աջակցություն պայմանավորել մարդու իրավունքների լիարժեք պահպանմամբ. Ապահովել, որ ՀՀ-ի հետ դիվանագիտական, ֆինանսական և քաղաքական գործընկերությունը խստորեն պայմանավորված լինի միջազգային պարտավորությունների փաստացի կատարմամբ, և ոչ քաղաքական նպատակահարմարությամբ։

• Մենք մեր մասնագիտական վաստակը չենք կերտել նրա համար, որ լռելայն հետևենք, թե ինչպես են համակարգված կերպով քանդվում մեր երկրի ժողովրդավարական հիմքերը։ Հայաստանի ժողովրդավարական ապագան չի կարող զոհաբերվել դիվանագիտական հարմարվողականությանը։

Ակնկալում ենք շուտափույթ արձագանք մեր այլևս հանրային կոչին։