Պողոս Գևորգյան. «Հայաստանը պետք է դարձնել ջերմատնային ինդուստրիալ երկիր». «Փաստ»

«Փաստ» օրաթերթը գրում է.

Տարին ջերմոցատերերը վատ ցուցանիշով չեն ամփոփում: «Փաստ»–ի հետ զրույցում հայտնեց Ջերմոցային ասոցիացիա ՀԿ նախագահ Պողոս Գևորգյանը:
Կառավարությունը գազի սակագինը ջերմոցային տնտեսությամբ զբաղվողների համար նվազեցրել էր: Սա դրական նախաձեռնություն են համարում, բայց իրենց գրպանին մեծ ազդեցություն չի թողել: Պատճառը սաստիկ ցուրտն է եղել:
«Տևական ժամանակ սառնամանիք էր, ստիպված էին նախատեսածից ավելի շատ գազ վառել, դրա համար այդ փոփոխությունն իրենց վրա չզգացին»,– նշեց Գևորգյանը:
Հայաստանում ջերմատների զարգացման համար Ջերմոցային ասոցիացիան ծրագիր է ներկայացրել: Ջերմոցներում օրգանական գյուղմթերք արտադրելու համար առաջարկում են իրենց սուբսիդավորված վարկեր տրամադրել: Ըստ նրա, իրենց նպատակն է ջերմատները զարգացնել հատկապես լեռնային գոտիներում, ինչը հնարավորություն կտա համայնքներում կրճատել գործազրկության մակարդակը:
«Մենք այսօր հնարավորություն ունենք լեռնային գոտիներում ջերմատներ սարքել, այնտեղ հողն ու ջուրը մաքուր է, ինչի շնորհիվ օրգանական գյուղմթերք կարող ենք արտահանել: Լեռնային գոտիները մեզ մոտ սահմանամերձ են, ուստի մարդիկ կարող են նաև ջերմատներում աշխատել և չարտագաղթել: Իմացա, որ Մեղրիի գյուղերում մարդ չի մնացել, իսկ այդ տարածքը մեզ համար ստրատեգիական նշանակություն ունի»,– կարևորեց ՀԿ նախագահը:
Մեկ ամիս առաջ գյուղնախարարությանը հասցեագրած առաջարկությունների պատասխանը դեռ չեն ստացել:
«Հայաստանը պետք է դարձնել ջերմատնային ինդուստրիալ երկիր, որ մեր սերմերով, մեր տնկանյութերով արտադրանք տանք: Լավ որակի լոլիկ արտադրելու հնարավորություն ունենք»,– նկատեց Պողոս Գևորգյանը:
Ջերմոցատերերն առայժմ խնդիրներ չունեն, բայց վախը Պողոս Գևորգյանի սրտում է: Նրա խոսքով՝ գազն անորակ է, ինչի հետևանքով ֆերմերները ավել են ջեռուցում՝ բույսը չցրտահարելու համար: Սակագինը նրանց համար բարձր է:
«Ֆերմերներն այս պետությունից մի բան են ուզում, ասում են՝ գազի գինն էժանացրեք և նախկին գինը սարքեք: Այդ ժամանակ կարող են ջերմոցային տնտեսությունները զարգացնել, և ոչ մի թուրք չի կարող մրցակցել հայկական լոլիկի դեմ»,– ասաց մեր զրուցակիցը:
Մի քանի տարի առաջ Ջերմոցային ասոցիացիան Ռուսաստանի Դաշնության առևտրի կետերից մեկի հետ պայմանագիր էր կնքել: Ամսական 15000 տոննա բանջարեղեն պետք է մատակարարեին, պայմանավորվածությունն այդպես էլ կյանքի չի կոչվել: Այդ քանակությամբ բերք Հայաստանը չի կարող արտահանել:
«Այդքան ջերմոց չունենք: Մայիսին, երբ բերքն ավելանում է, կարող ենք մեծ քանակությամբ արտահանել: Գինն ասացի, ասացին՝ այստեղ հայերն ավելի էժան գնով են վաճառում: Պարզվեց՝ թուրքական լոլիկն է Հայաստանից արտահանվել Ռուսաստան»,– պատմեց նա:
Գևորգյանը լոլիկի արտահանման հույսը Հայաստան–ԵՄ ասոցացման համաձայնագրի հետ է կապում: Սակայն, նրա խոսքով, դրա համար անհրաժեշտ է պետության աջակցությունը և այդ ոլորտի զարգացման համապատասխան հայեցակարգը: Փորձելու է Եվրոպական շուկան հայկական հյութեղ լոլիկով գրավել:
«Եվրոպացին օրգանական մաքուր մթերքին կարոտ է: Կփորձեմ համագործակցել և լոլիկ դուրս հանել: Այնտեղ օրգանական մաքուր լոլիկն արժե 6 ֆունտ ստերլինգ, դա մոտ 2500 դրամ է: Եթե մենք կարողանանք օրգանական մաքուր գյուղմթերք արտահանել, շուկայի խնդիր չենք ունենա, մնում է արտադրությունը կազմակերպենք: Դա իրագործելու համար մեր մեջքին պետք է պետությունը կանգնի»,– մատնանշեց նա:
Թուրքիայից լոլիկ չի ներկրվում, ինչի շնորհիվ տեղական արտադրողը խնդիրներ չունի՝ իր հերթին ասաց ֆերմեր Վարուժան Խոդեդանյանը: Անմիջապես ջերմոցից այսօր լոլիկը ֆերմերը 400–500 դրամով է վաճառում, իսկ վարունգը՝ 500–600: Նրա խոսքով՝ այս շրջանում միջազգային շուկայում լոլիկի և վարունգի գներն անհամեմատ բարձր են:

Շարունակությունը՝ «Փաստ» օրաթերթի այսօրվա համարում