«Մեզ նույնիսկ ՔՊ-ում են ավելի շատ վստահում». Սամվել Կարապետյանը՝ ընտրությունների վճռորոշ նշանակության մասին
«Ուժեղ Հայաստան» կուսակցության առաջնորդ, վարչապետի թեկնածու Սամվել Կարապետյանը հայտարարել է, որ նախընտրական վերջին օրերին քաղաքական ուժի գլխավոր խնդիրը համակիրների մոբիլիզացումն է և հատկապես Երևանի որոշ վարչական շրջաններում ընտրողների պասիվության կանխումը։
Նրա խոսքով՝ կուսակցության ներքին հարցումները ցույց են տալիս, որ ամենամեծ աջակցությունը կենտրոնացած է մայրաքաղաքի Արաբկիր և Կենտրոն վարչական շրջաններում։ Միևնույն ժամանակ նա մտահոգություն է հայտնել, որ հենց այդ հատվածի ընտրողների շրջանում կա ընտրություններին չմասնակցելու վտանգ։
«Այն հիմնական բանը, որ տեսնում ենք մեր առանցքային ընտրողների շրջանում անցկացված հարցումներով, Արաբկիր և Կենտրոն շրջաններն են՝ քաղաքի կենտրոնական մասը: Ձեր բոլոր շրջաններում իրավիճակն իրոք շատ լավ է, բայց վտանգ կա, որ այդ շրջանների բնակիչները չեն գնա ընտրության»,- նշել է նա։
Կարապետյանի խոսքով՝ քարոզարշավի վերջին օրերին անհրաժեշտ է կենտրոնանալ երկու կարևոր ուղղությունների վրա՝ ապահովել քաղաքացիների մասնակցությունը քվեարկությանը և հանրության ուշադրությունը հրավիրել երկրի առջև կանգնած մարտահրավերների վրա։
«Ուստի այս վերջին 10 օրերին պետք է ձեզ երկու բան ասենք. առաջին՝ պետք է գնալ ընտրության, այլապես ադրբեջանցիները կընտրեն: Երկրորդ՝ անհրաժեշտ է կանգնեցնել 300 հազար ադրբեջանցիներին: Հիմա հենց այս խոսույթն է կարևոր»,- հայտարարել է նա։
Անդրադառնալով հասարակական տրամադրություններին՝ կուսակցության առաջնորդը նշել է, որ իր քաղաքական ուժի նկատմամբ վստահությունը շարունակում է աճել, այդ թվում՝ իշխանության համակիրների շրջանում։
«Տնտեսական առումով մարդիկ արդեն մեզ վստահում են: Ասել եմ, որ նույնիսկ «Քաղաքացիական պայմանագիր» կուսակցության ներկայացուցիչներն են մեզ վստահում. պատկերացրեք՝ մեզ չորս անգամ ավելի շատ են վստահում, քան Փաշինյանին»,- ասել է Կարապետյանը։
Նա վստահություն է հայտնել, որ իր քաղաքական ուժի ծրագրերը կարող են էապես փոխել մայրաքաղաքի տեսքն ու զարգացման ընթացքը։
«Հինգ տարին մեզ բավական կլինի որակապես այլ քաղաք, տարածաշրջանի լավագույն քաղաքը ստեղծելու համար, և հայ ժողովուրդը նորից կհպարտանա իր մայրաքաղաքով»,- նշել է նա։
Կարապետյանը խոսել է նաև Երևանի սոցիալ-տնտեսական խնդիրների մասին՝ ընդգծելով, որ մայրաքաղաքի ենթակառուցվածքները երկար տարիներ չեն արդիականացվել, մինչդեռ բնակչության թիվը շարունակել է աճել։
Նրա գնահատմամբ՝ մարզերից Երևան շարունակվող ներհոսքը պայմանավորված է աշխատատեղերի և կենսապայմանների անհավասար բաշխմամբ, ինչի հետևանքով մայրաքաղաքը կանգնել է գերծանրաբեռնվածության խնդրի առաջ։
«Այսօր, եթե թվում է, թե Երևանը չի հայաթափվում, ապա դա ոչ թե այն պատճառով է, որ ծնելիությունն է աճում, այլ որովհետև մարզերն են փաստացի հայաթափվում. մարդիկ տեղափոխվում են Երևան, քանի որ այստեղ աշխատատեղեր կան և ինչ-որ կերպ գոյատևելու հնարավորություն»,- ասել է նա։
Կարապետյանի խոսքով՝ մայրաքաղաքում արդեն ակնհայտ են ենթակառուցվածքային ճգնաժամի նշանները, որոնք արտահայտվում են տրանսպորտային խնդիրներով, կոմունալ ծառայությունների խափանումներով և համակարգերի գերծանրաբեռնվածությամբ։
«Ինքներդ եք զգում, որ Երևանն արդեն շնչահեղձ է լինում. չի աշխատում և ոչ մի համակարգ, տրանսպորտը չի գործում, տեղի են ունենում հոսանքազրկումներ»,- նշել է նա։
Նա հիշեցրել է, որ քաղաքի հիմնական ենթակառուցվածքները ձևավորվել են տասնամյակներ առաջ և նախատեսված չեն ներկայիս ծանրաբեռնվածության համար։
«Մի քանի տարում քաղաքի մեջ փաստացի խցկել են Վանաձորի և Գյումրիի բնակչությունը՝ առանց որևէ ենթակառուցվածք կառուցելու: Երևանի համակարգն ընդհանուր առմամբ կառուցվել է դեռ 1960-ականներին և հիմա գերծանրաբեռնված է՝ առանց հաշվարկների»,- նշել է Կարապետյանը։
Նրա խոսքով՝ այդ իրավիճակի հետևանքներից են նաև պարբերական անջատումները և էներգամատակարարման խնդիրները։
«Էլեկտրականություն կա, գազ՝ ոչ, հետո զարմանում են, որ անջատումներ են լինում: Իսկ ուրիշ ի՞նչ սպասել, եթե հզորությունը բավարար չէ, եթե մալուխները նախատեսված չեն նման ծանրաբեռնվածության համար»,- հավելել է նա։
Ելույթի ավարտին «Ուժեղ Հայաստան» կուսակցության առաջնորդը հայտարարել է, որ վերջին տարիներին իրականացված քաղաքականության հետևանքով երկրի զարգացման տեմպերը կանգ են առել, և անհրաժեշտ են համակարգային փոփոխություններ՝ հետագա անկումը կանխելու համար։
«Այն, ինչ արեցին, բոլոր ջանքերը զրոյացրին: Եվ մեզ դեռ կարող են ավելի հետ շպրտել՝ ընդհուպ մինչև 1970-ականների մակարդակ»,- հայտարարել է Սամվել Կարապետյանը։
Հայկական E-auto-ի՝ շուրջ $5 մլն ներդրումը. Երևանում բացվել է HONGQI-ի՝ տարածաշրջանում խոշորագույն կե...
Հրատապ. Սյունիքը կտրվելու է,Ալիևը Տիգրանաշեն զորք է մտցնելու. Գեներալ Արշակ Կարապետյան
Ակնկալում եմ ձեր ազնիվ պատասխանները. Արշակ Կարապետյան
«Հանրային դաշինքը» քաղաքական հետապնդումների թեմայով հանրային քննարկում է հրավիրում
Ձևավորվել է Գագիկ Ծառուկյանի պաշտպանության հանրային կոմիտե՝ կազմված սփյուռքի եւ Հայաստանի հեղինակավո...
3 նախարարությունների անվանումները կփոխվեն. Կառավարության կառուցվածքի փոփոխության նախագիծը ընդունվեց
Եվս մեկ անգամ վարչախմբին հորդորում ենք` ձեռքներդ հեռու՜ ՀՀ հիմնադիր փաստաթղթից. ՀայաՔվե
Ավտոտնակում հիմնադրված հայկական բիզնես. խաղեր՝ իրական շփման համար
Ո՞ւր են տանում անշարժ գույքի շուկայի նոր «բումի» սուր կողմերը. «Փաստ»
Քաջարանը զարգանում ու գեղեցկանում է՝ պահպանելով իր յուրահատուկ դիմագիծն ու հարուստ արդյունաբերական ժ...
