Միքայել Մելքումյան. «Երբ մարդն իրեն թույլ է տվել նման ստոր քայլի գնալ». «Փաստ»

«Փաստ» օրաթերթը գրում է.

Անկեղծ ասած հասկանալի չէ, թե «Ավտովարորդների իրավունքների լիգա» հասարակական կազմակերպության նախագահ Տիգրան Հայրապետյանն ինչու է մտել հարկայինի և «Առինջ մոլ»–ի արանքը, ձեռքի հետ էլ հանկարծ որոշել` մի երկու կարծիք էլ «Ծառուկյան» դաշինքի ղեկավարի հասցեին հնչեցնել: Ու ամենաուշագրավն այն է, որ այս անգամ նա լրագրողներին որոշել է ներկայանալ ոչ թե որպես վարորդների պաշտպան, այլ, ոչ ավել, ոչ պակաս, «Հայաստանի ձեռներեցների կոնֆեդերացիայի» նախագահ:

Եթե նա որոշեր իր մասնագիտականին վերաբերող թեմաների մասին կարծիք հայտնել, ինչ–որ տեղ հասկանալի կլիներ, բայց լիգայից կոնֆեդերացիա թռիչքն ու ոլորտների կտրուկ փոփոխությունը մի տեսակ հասկանալի չէ…

Համաձայնեք, որ այնքան էլ լուրջ չէ, երբ օրվա բանախոսը խոսում է առանց փաստերի ու ընդամենը քամի անելու համար՝ չհասկանալով, որ հերյուրանքներ տարածելով միայն իրեն կարող է նսեմացնել: Սա գիտի ցանկացած լրագրող, բայց արի ու տես, որ այս հայտնի թեզը դեռ չի էլ հասել որոշ ՀԿ–ներ:

Խնդիրն այն է, որ լրագրողների հետ հանդիպման ժամանակ նա կարծիք է հայտնել, թե՝ «բացառված է, որ պարոն Ծառուկյանը տեղյակ չլինի, թե իր «Առինջ մոլի» ղեկավարներն ինչ շահեր ունեն, ինչ գումարներ են աշխատել ժամանակին և ինչից են զրկվել»:

Այստեղ ամենահետաքրքիրն այն չէ, թե ինչ է նա ասել, այլ հետաքրքիր է, թե ինչու է նա հանկարծ որոշել մի անձնավորության ու թեմայի մասին խոսել, որից իրականում կիլոմետրով հեռու է: Եվ հենց այդ հեռավորությունն է եղել պատճառը, որ ժամանակին երկար ու ձիգ ամիսներ է սպասել, որ իր ու իր ոլորտակիցների խնդիրների մասին խոսի նույն այն անհատի հետ, ում այսօր որոշել է վարկաբեկել: Ու հիմա, երբ որոշ ժամանակ է անցել, փաստորեն, նա որոշել է կրկին հորիզոնում երևալ: Եվ ո՛չ ավել, ո՛չ պակաս, այսպես ասած՝ ռևանշի ոճով կարծիք հայտնել մի մարդու մասին, ով ժամանակին իրեն ու իր թիմակիցներից շատերին է ձեռք մեկնել ու փոսից հանել:

ԱԺ փոխնախագահ Միքայել Մելքումյանը «Փաստի» հարցին, թե իրականում ինչու է «Ավտովարորդների իրավունքների լիգա» հասարակական կազմակերպության նախկին նախագահը լրագրողների մոտ նման կարծիք հայտնել և ինչ դիտարկումներ նա ունի կատարվածի մասին, նշեց, որ ԶԼՄ–ներով շրջանառության մեջ դրված տեսանյութը, որտեղ կազմակերպության ներկայացուցիչը Գագիկ Ծառուկյանի մասին «կարծիք» էր հայտնում, խոսում էր նաև իրար հետ կապ չունեցող տարբեր ոլորտների մասին նույնպես:

«Եվ զարմանալին այն էր, թե ինչպես կարող է մարդն այնքան մեծ երևակայություն ունենալ, որ նույնիսկ իրեն հաշիվ չտա, թե ինչ է խոսում:

Իմ գործընկերների փոխանցմամբ, սակայն, նա մի անձնավորություն է, ով ժամանակին օրերով ու ամիսներով հերթ է կանգնել ու սպասել, թե երբ կկարողանա Գագիկ Ծառուկյանն իրեն ընդունել, իսկ հիմա իրեն թույլ է տվել տարօրինակ և զավեշտալի արտահայտություններ անել նույն այդ անձնավորության մասին:

Համարում եմ, որ այս կերպարի հանդես գալն անհեթեթություն է, և ստացվում է, որ նա ինչ–որ մեկի պատվերն է կատարում: Ու երբ մարդն իրեն թույլ է տալիս նման ստոր քայլի գնալ, նշանակում է, որ նա հասարակության մեջ իր տեղն ու դերը ճշտելու լրջագույն խնդիր ունի: Ես համարում եմ, որ դա ստորագույն քայլ է, որն անհամատեղելի է սովորական մարդկային վարք ու բարքի հետ»,– ասաց Մ. Մելքումյանը:

Հարցին, թե այս պահին կա՞ն արդեն ենթադրություններ, թե ով կարող էր կանգնած լինել նման պատվերի հետևում, ԱԺ փոխնախագահը նշեց, որ թեև այս պահին դժվար է կանխատեսել, թե որտեղից է եղել պատվերը, բայց ևս մեկ անգամ ընդգծեց, որ բավականին տարօրինակ և անընկալելի է, երբ հաշվի չառնելով սեփական անցյալը, մարդը կարող է իրեն թույլ տալ անմարդկային և ստոր պահվածք ու վարքագիծ ցուցաբերել:

«Դա անհամատեղելի է նորմալ արժեհամակարգ ունեցող մարդկային կերպարի հետ»,– խոսքը եզրափակեց Մ. Մելքումյանը:

Շարունակությունը՝ «Փաստ» օրաթերթի այսօրվա համարում