Արմեն Պողոսյան. «Պատվաստումների հարցում մարդկանց շրջանում սարսափներ են տարածվում». «Փաստ»

«Փաստ» օրաթերթը գրում է.

Շուրջ երկու շաբաթից Հայաստանում պապիլոմա վիրուսի դեմ պատվաստվելու են 13 տարեկան աղջիկները, ինչի նպատակն է կանխարգելել արգանդի վզիկի քաղցկեղը: Մարդու պապիլոմա վիրուսի դեմ «Գարդասիլ» պատվաստանյութով իրականացվող պատվաստումների ծրագիրը հասարակության մեջ քննարկման առիթ դարձավ: Բուժոլորտի և հասարակության տարբեր շերտերի ներկայացուցիչներ դեմ են պատվաստանյութի կիրառմանը: Պապիլոմա վիրուսի դեմ պատվաստումների վերաբերյալ ծնողների շրջանում առաջացել են բազմաթիվ հարցեր, մի մասը վստահ է, որ աղջիկների վրա ցանկանում են փորձարկումներ կատարել:

Առողջապահության նախարարությունը հասարակական կազմակերպությունների մասնակցությամբ նաև հանրային քննարկում կազմակերպեց:

Սպառողների միության նախագահ Արմեն Պողոսյանը մասնակիցներից մեկն է: Գնահատական հնչեցնելու հարցում զգուշավոր է, բժիշկ չէ, ավելի շատ բժշկական ոլորտի ներկայացուցիչների կարծիքն է արժևորում:

«Կրթված մարդը չի կարող լինել ո՛չ կողմ, ո՛չ դեմ: Գիտությանը դեմ ո՞վ կարող է լինել: Եթե բժիշկները, Համաշխարհային առողջապահության կազմակերպությունն ընդունել են այս քաղաքականությունը, ուրեմն՝ ճիշտ է»,– «Փաստ» օրաթերթի թղթակցի հետ զրույցում ասաց Արմեն Պողոսյանը:

Նրա խոսքով՝ ցանկացած պատվաստում կիրառվելուց առաջ 10–ը տարի ուսումնասիրվում և փորձարկվում է: Պողոսյանը նշեց, որ այսօր մեր հասարակությունում ավելի շատ սարսափներ տարածելու երևույթն է մեծ տեղ գրավում, ինչի արդյունքում ամեն հարցին քննադատորեն են մոտենում:

«Մարդկանց ավելի շատ ահաբեկում են սարսափներ տարածելով: Ամեն տեղ սարսափներ են տարածում: Մարդկանց ուղեղներում է, որ աշխարհը կառավարող ուժերը ցանկանում են բնակչության թիվը կրճատել: Եթե այս մարմաջը նրանց գլխում է, ուրեմն՝ անիմաստ է խոսելը: Մեր բնակչությունն առանց այն էլ կրճատվում է, ո՞վ չգիտի սրա մասին: Էլ ինչ կարիք կա մեկ ուրիշ միջոցառում կիրառել, որ այլևս հայ չծնվի: Ո՞ր հիվանդ գլխում կարող է միտք առաջանալ, որ այլևս հայեր չծնվեն»,– ասաց նա: Այս հարցում տարակարծիք են նաև քաղաքացիները: Նրանցից շատերը աղջիկների պատվաստման հարցում տարակուսում են:

«Տարբեր կարծիքներ ենք լսում, ու մենք էլ չենք կարողանում կողմնորոշվել: Չգիտենք՝ դա լա՞վ է, թե վատ: Վախենում ենք դեռ ռիսկի դիմել»,– մեզ հետ զրույցում ասաց քաղաքացիներից մեկը:

Նշենք, որ ներկայում մեր երկրում արգանդի պարանոցի քաղցկեղով հաշվառված է 3030 հիվանդ։ Յուրաքանչյուր տարի արձանագրվում է միջինը 250 նոր դեպք։ Կանանց շրջանում քաղցկեղների կառուցվածքում 2–րդ տեղը գրավող այս հիվանդության մահացության ցուցանիշը 100000 կնոջ հաշվարկով 7–8 է։

Ըստ մասնագետների՝ արդեն 71 զարգացած երկիր պապիլոմա վիրուսի դեմ ազգաբնակչությանը պատվաստում է:

Շարունակությունը՝ «Փաստ» օրաթերթի այսօրվա համարում