Հովիկ Աբրահամյանը հերքում է. «Գազալցակայաններ չունեմ ու չեմ էլ ունեցել»

Այսօր մամուլով տեղեկություն տարածվեց այն մասին, որ հարկային ծառայության աշխատակիցները ստուգումներ են կատարել ՀՀ նախկին վարչապետ Հովիկ Աբրահամյանին պատկանող գազալցակայաններում և հայտնաբերված խախտումների հիման վրա 140 մլն դրամի տուգանք նշանակել: Նկատենք, որ լրատվամիջոցը հղում է կատարել սեփական աղբյուրի վրա և չբացահայտելով այն, նշել, թե իբր Հովիկ Աբրահամյանը անձամբ է խնդրել վարչապետ Կարեն Կարապետյանին նվազեցնել տուգանքի չափը, ինչի արդյունքում այն կտրուկ իջել է՝ դառնալով 3 մլն: Բայց նախկին և ներկա վարչապետների այս պայմանավորվածության մասին տեղեկությունը հասանելի է դարձել նախագահ Սերժ Սարգսյանին, ով կարգադրել էԱբրահամյանի գազալցակայաններում կրկնակի ստուգումներ իրականացնել, և այս անգամ տուգանքի չափը դարձել է 160 մլն: Ճշտելու համար, թե արդյոք տարածված տեղեկությունը ունի ճշմատրության երանգներ Past.am-ը կապ հաստատեց ՀՀ նախկին վարչապետ Հովիկ Աբրահամյանի հետ, ով նշեց.
«Ձեր տված հարցին կպատասխանեմ լակոնիկ՝ տեղեկությունը իրականության հետ կապ չունի, քանի ես գազալցակայաններ չունեմ ու չեմ էլ ունեցել»: