Փաշինյանի սիրտը սահմանադրական մեծամասնություն է ուզում

Սյունիքի և Վայոց ձորի մարզեր կատարած այցի վերջում Փաշինյանը հանդիպում է ունեցել կուսակցության ներկայացուցիչների հետ՝ հայտարարելով, թե իր հետևությունն այն է, որ առաջիկա խորհրդարանական ընտրություններում սահմանադրական մեծամասնություն ստանալն առավել քան իրատեսական է «Քաղաքացիական պայմանագիր» կուսակցության համար։

«Մենք այս երկու օրվա ընթացքում ամենաշատը լսել ենք խաղաղության մասին։ Ես որևէ կասկած չունեմ, որ 2026թ.-ի հունիսի 7-ին ՀՀ քաղաքացին տեր է կանգնելու խաղաղությանը։ Ի հայտ է գալիս նաև անսպասելի համախոհների բազմահազարանոց բանակ. դրանք մեր երեխաներն են, ովքեր ամեն օր իրենց տներից իրենց ընտանիքների սերն են բերում մեզ և մեր սերը հետ են տանում իրենց ընտանիքներ։ 2026թ.-ի հունիսի 7-ին հաղթելու է Հայաստանի Հանրապետության ժողովուրդը»,- ասել է Փաշինյանը։

Ցանկացած տրամաբանության ու փաստարկի համաձայն՝ Փաշինյանին չի հաջողվելու սահմանադրական մեծամասնություն ստանալ, նույնիսկ մեծամասնություն ստանալն է լուրջ հարցականի տակ։ Բայց Փաշինյանն այսպիսի հայտարարություններով փորձում է տոտալ ընտրակեղծիքների համար նախադրյալ ստեղծել։ Որ գործող իշխանությունները բնավ մտադիր չեն ազնիվ մեթոդներով պայքարել ընդդիմության դեմ, պարզ է յուրաքանչյուրին։

Ընդ որում, խորհրդարանական առաջիկա ընտրություններին գործի են դրվելու ոչ միայն ավանդական ընտրակեղծիքները, այլև այսպես կոչված «մոլդովական սցենարը», երբ ընդդիմադիր հիմնական ուժերին տարբեր պատճառաբանություններով դուրս թողնեն ընտրություններից։ Բայց նույնիսկ այդ դեպքում իշխանության հաղթանակը երաշխավորված համարել չի կարելի, իսկ փողոցային պայքարն ավելի լայն դրսևորումներ է ստանալու։ Իշխանությունն, իհարկե, դա հասկանում է և ակտիվ պատրաստվում ուժային զարգացումներին։ Հարց է, թե ինչի՞ է պատրաստ ընդդիմությունը։

Աննա Մարգարյան