CMSI-ի ստանդարտների ներդրումը կարող է նպաստել Հայաստանի հանքարդյունաբերական ոլորտի միջազգային մրցունակության բարձրացմանը

FMF-2026․ Հայաստանը միջազգային երկխոսության կողմ՝ հանքարդյունաբերության նոր չափանիշների շուրջ.

 

Սաուդյան Արաբիայի մայրաքաղաք Ալ Ռիադում երկրորդ օրն է` շարունակվում է FMF-2026 միջազգային հանքարդյունաբերական ֆորումը, որին կառավարության պատվիրակության կազմում մասնակցում է նաև Հայաստանի հանքարդյունաբերության և մետալուրգիայի ասոցիացիայի նախագահ Վարդան Ջհանյանը։

Ինչպես արդեն նշել ենք, ֆորումի շրջանակում նա հանդիպել է Հանքարդյունաբերության և մետաղների միջազգային խորհրդի նախագահ Ռոհիթեշ (Ռո) Դհավանի հետ։

Հանդիպման ընթացքում, ի թիվս այլ կարևոր հարցերի, անդրադարձ է կատարվել Հանքարդյունաբերության համախմբված ստանդարտների նախաձեռնության (CMSI) կողմից մշակվող նոր միջազգային չափորոշիչների մշակմանը, որոնք նպատակ ունեն ապահովել ոլորտում կայուն զարգացում, բարձր թափանցիկություն, շրջակա միջավայրի պահպանություն, սոցիալական պատասխանատվություն և կառավարման լավագույն փորձի կիրառում։

Քննարկումների ընթացքում ընդգծվել է, որ նշված ստանդարտները կարող են դառնալ համաշխարհային հանքարդյունաբերության նոր չափանիշ, և առաջարկ է հնչել, որպեսզի Հայաստանը ևս դիտարկի դրանց կիրառման հնարավորությունը։ Ըստ կողմերի՝ CMSI-ի ստանդարտների ներդրումը կարող է նպաստել Հայաստանի հանքարդյունաբերական ոլորտի միջազգային մրցունակության բարձրացմանը, ներդրումային միջավայրի բարելավմանը և հանրային վստահության ամրապնդմանը։

Ռոհիթեշ Դհավանին գործընկերոջը մանրամասնել է Հանքարդյունաբերության համախմբված ստանդարտների նախաձեռնության (CMSI) առաքելության մասին․

«Նախաձեռնությունը միտված է հանքարդյունաբերության ոլորտում գործող բազմաթիվ միջազգային ստանդարտների միավորմանը մեկ միասնական շրջանակի մեջ։ Ներկայում ոլորտը կարգավորվում է տարբեր, հաճախ իրարից անկախ պահանջներով՝ շրջակա միջավայրի պահպանությունից և աշխատողների անվտանգության ապահովումից մինչև սոցիալական պատասխանատվություն, թափանցիկություն և հաշվետվողականություն։ CMSI-ն փորձում է նվազեցնել այս բազմազանության բարդությունը և ստեղծել մեկ համադրված մոտեցում, որը կօգնի հանքարդյունաբերական ընկերություններին ավելի արդյունավետ կերպով համապատասխանել միջազգային պահանջներին և բարձրացնել ոլորտի կառավարման որակը»,- ասել է նա։

Վարդան Ջհանյանն, իր հերթին, կարևորել է միջազգային առաջատար կառույցների հետ շարունակական երկխոսությունը՝ նշելով, որ Հայաստանի համար առաջնահերթ է ոլորտի զարգացումը՝ համահունչ ժամանակակից միջազգային պահանջներին և կայուն զարգացման սկզբունքներին։

FMF-2026 ֆորումը շարունակում է իր աշխատանքները՝ հարթակ հանդիսանալով հանքարդյունաբերության ապագային վերաբերող ռազմավարական քննարկումների և համագործակցության նոր հնարավորությունների ձևավորման համար։