Ադրբեջանն իր անհաջողություններում հայի արյուն է փնտրում. «Փաստ»

«Փաստ» օրաթերթը գրում է.

Պարզվում է՝ Ադրբեջանի համար աշխարհի բոլոր մեղքերի ակունքում, բոլոր անհաջողությունների պատճառը հայերն են: Դեռ ավելին, երբ իրենց ինչ–որ մեկի դիրքորոշումը դուր չի գալիս՝ մատնանշում են տվյալ մարդու հայկական ծագում ունենալու փաստը:

Օրերս, ռուս–իսրայելական բլոգեր Ալեքսանդր Լապշինը նշել էր, որ մտադիր է դիմել Մարդու իրավունքների Եվրոպական դատարան Ադրբեջանի դեմ հայցով, որտեղ նախկինում դատապարտված էր եղել երեք տարվա ազատազրկման: Վերջինս իհարկե ութ ամիս անց՝ այս սեպտեմբերին, բաց էր թողնվել: Դատարանում իր ձերբակալությունը վիճարկելու պատրաստակամության մասին Լապշինը հայտնել էր իր բլոգում՝ ներկայացնելով իր դիտարկումները ադրբեջանական ԶԼՄ–ների՝ ռուսական իշխանությունների նկատմամբ ունեցած վերաբերմունքի մասին:

Լապշինն իր բլոգում գրել է, որ իր Բաքվի ընկերներն իրեն մի հոդվածի հղում են ուղարկել. «Բարկանալով Ռուսաստանի Դաշնության իմ իրավունքները պաշտպանելու փաստից՝ Ադրբեջանի իշխանությունները իրենց ԶԼՄ–ների միջոցով սկսել են քարկոծել ռուսական իշխանություններին: Սկզբում վիրավորում էին ԱԳՆ մամլո ծառայության ղեկավար Մարիա Զախարովային, իսկ հիմա հասել են Ռուսատանի արտգործնախարար Սերգեյ Լավրովին՝ անվանելով նրան արտաքին գործերի ռուս–հայկական նախարար, ինչի մասին գրում է պաշտոնական ԶԼՄ–ն»:

Նշենք, որ Լավրովի արմատների վերաբերյալ տարբեր տեղեկություններ կան: Հայկական Վիքիպեդիայում գրված է, որ նա հայկական արմատներ ունի: Որոշ տեղերում նշվում է, որ նրա հայրը թբիլիսահայ է և կրել է Քալանթարով կամ Քալանթարյան ազգանունը: Սակայն մինչդեռ Ռուսաստանի արտաքին գործերի նախարարության կայքում նշվում է, որ Լավրովը ռուս է:

Ամեն դեպքում մարդու արմատների՝ այս դեպքում հայկական ծագում ունենալու շահարկումը, միմիայն խոսում է ադրբեջանցիների` մեր դեմ տրամադրվածության և աշխարհի ցանկացած խնդրում՝ հայերիս մեղքի բաժինը խոշորացույցով փնտրելու մասին: Այստեղ են ասել՝ սեփական աչքի գերանը թողած, ուրիշի աչքի փուշն են տեսնում:

Ըստ Լապշինի՝ հոդվածում դիտավորյալ կերպով նշվում է ՌԴ արտգործնախարարի ազգությունը, ինչը թողնում է տպավորություն, թե ցանկացած մարդ, ով ունի ինչ–որ կապ հայ ժողովրդի հետ՝ արդեն հանցագործ է: Դե իսկ Ադրբեջանի՝ հայերի նկատմամբ ունեցած վերաբերմունքը հայտնի է բոլորին ու շատ վաղուց:

«Ու սա տեղական ԶԼՄ–ներն են քաղաքացիների գլուխը մտցնում՝ այդպիսով թշնամու կերպարն էլ ավելի ընդգծելով: Սա հիշեցնում է Հիտլերի ռասայական թեորիան հերաների ու սլավոնների վերաբերյալ: Այնպես չէ՞: Նացիստները նույնպես սիրում էին արիականների մեջ «կեղտոտված արյան» տոկոս որոշել, ու միաժամանակ պետության բոլոր խնդիրները վերագրել հրեաների ինտրիգներին»,– գրում է Լապշինը:

Լապշինը նաև շեշտում է, թե միաժամանակ որքան լավն են Մոսկվայի, Լոնդոնի, Թել Ավիվի ու Կիևի իր ադրբեջանական ընկերները, նույնքան էլ տհաճ է այդ պետությունը՝ հավելելով, որ մոտավորապես մեկուկես ամսվա ընթացքում իր բողոքը կհասնի Ստրասբուրգ՝ ՄԻԵԴ:

 Շարունակությունը՝ «Փաստ» օրաթերթի այսօրվա համարում