Օրենքով մոլորություն. «Օդից փող» սարքողները. «Փաստ»

«Փաստ» օրաթերթը գրում է.

«Հ2» հեռուստատեսությամբ հեռարձակվող «Օդից փող» հեռուստախաղին մասնակցելու հետևանքով մի շարք քաղաքացիներ վնաս են կրել: Սա հիմք է հանդիսացել, որ Մարդու իրավունքների պաշտպանի աշխատակազմը «Հեռուստատեսության և ռադիոյի մասին» ՀՀ օրենքում փոփոխություններ և լրացումներ կատարելու մասին նախագիծ ներկայացնի: Մասնավորապես՝ առաջարկում են նշված օրենքը փոփոխել այնպես, որ նման խաղերը հնարավոր լինի հեռարձակել միայն գիշերային ժամերին՝ 24։00–ից մինչև 06։00–ը: Նախագիծը նախատեսում է սահմանել նաև նախազգուշացում անչափահասների մասնակցության արգելքի վերաբերյալ։

Նշված հեռուստախաղի ընթացքում հաղորդավարը հնչեցնում է հարցեր, որոնց պատասխանելու համար հեռուստադիտողները կարող են զանգահարել էկրանին հայտնվող հեռախոսահամարով: Զանգի մեկ րոպեն արժե 540 դրամ: Գումարը սկսվում է հաշվվել այն պահից, երբ կատարվել է զանգը: Հաղորդավարին միանալ կարող է միայն պատահականության սկզբունքով ընտրված քաղաքացին: Ի վերջո, «ընտրվածի» և մյուսների հեռախոսային հաշվին կարող է ահռելի գումար կուտակվել, քանի որ ստիպված են սպասել մինչ հաղորդավարին միանալը:

«Հ2» հեռուստատեսության ծրագրերի կոորդինացիայի բաժնից փորձեցինք տեղեկանալ՝ հաշվի առնելով արդեն ամիսներ շարունակ հնչող բողոքները, չի քննարկվո՞ւմ արդյոք հաղորդումն այլևս չցուցադրելու կամ այն փոփոխությունների ենթարկելու հարցը:

Ծրագրերի կոորդինացիայի բաժնի աշխատակիցը, ով չցանկացավ ներկայանալ, նշեց. «Ոչ մի օրենք, ոչ մի կարգ չկա, որը կարող է արգելել հեռարձակել հաղորդումը: Այդպիսի օրենք գոյություն չունի, որովհետև ամեն ինչ կատարվում է օրենքի մեջ: Այսինքն՝ րոպեի արժեքը, խաղարկության բոլոր կանոնները հեռուստաընկերությամբ անընդհատ ասվում և շեշտվում են: Իսկ եթե քաղաքացին չի ցանկանում մասնակցել, թող չմասնակցի»:

Հարցին, թե օրենքից զատ, չեն հետաքրքրո՞ւմ արդյոք մարդկանց բողոքները, նա պատասխանեց.

«Այստեղ հետաքրքրելու հարց չկա: Դուք զանգահարել եք ծրագրերի կոորդինացիայի բաժին, մենք ծրագրերի կոորդինացիայով ենք զբաղվում: Չեմ կարող ասել»:

Իսկ դիտարկմանը, թե տեղյա՞կ են, որ ՄԻՊ–ն օրենսդրական նախագծով է հանդես եկել, աշխատակիցը պատասխանեց. «Օրենսդրական ոչ մի բան չի կարող կատարվել»:

«Իրազեկ և պաշտպանված սպառող» ՀԿ նախագահ Բաբկեն Պիպոյանը օրենսդրական նախագծի անհրաժեշտություն ևս տեսնում է, բայց կարծում է, որ այս դեպքում գլխավորն իրազեկումն է:

«Փաստացի մի կողմից ունենք այն, որ սպառողը տեսականորեն կարող է մոլորվել: Բայց մյուս կողմից՝ օրենքում դա որպես մոլորություն սահմանված չէ: Հետևաբար, նաև սանկցիաներ չեն կարող կիրառվել: Պետք է մեծ ծավալով բոլորս իրազեկենք մարդկանց, որ հնարավորինս խուսափեն նման հաղորդումներից: Պետք է հասկանան, որ եթե կարողանում են այդ հարցերին պատասխանել, մեծ հանճար չեն: Այդ պատասխանները հազարավոր մարդիկ կարողանում են գտնել: Սա ավելի շատ լոտո է: Լոտոյի սկզբունքով մարդը պատահական միանում է: Զանգելու է հազար հոգի, հազար հոգի վճարելու է լոտոյի համար, բայց մեկն է շահելու: Սրա մասին պետք է իրազեկել, որ նման հաղորդումներն, անկախ նրանից, թե որ հեռուստաընկերությամբ են հեռարձակվում, հնարավորություն չունենան կյանքի կոչվել ու գումար վաստակել: Այն, որ նշված հարցը դառնա խախտում՝ օրենսդրական փոփոխություններ են հարկավոր, որն այսօր չունենք»,– ասաց Բ. Պիպոյանը՝ միաժամանակ ընդգծելով, որ եթե հասկանանք, որ իրազեկվածության մակարդակը բավարար չէ, այդ դեպքում նոր կարող ենք համապատասխան օրենքների փոփոխության գնալ:

«Պայմանական վերցնենք՝ իրազեկման արդյունքում հաղորդմանը կսկսի հետևել ոչ թե 100, այլ 15 հոգի: Եթե քաղաքացիներն ամբողջությամբ իրազեկված լինեն, և «խափվածներ» չլինեն, այդ դեպքում հեռուստաընկերությունը կամ մասնավոր ընկերությունը մուտքեր քիչ կունենա: Այս պարագայում արդեն իրենք են քննարկելու՝ ունենալ հաղորդում 15 հոգու համար, թե՝ ոչ»:

Շարունակությունը՝ «Փաստ» օրաթերթի այսօրվա համարում