Հայ զինվորը, ուսանողն ու մանկատան սաները՝ յուրահատուկ հարթակում. «Փաստ»

«Փաստ» օրաթերթը գրում է.

Նոյեմբերի 7–ին Երևանում, Գավառում և Ալավերդիում կմեկնարկի «Ռոլան» մանկապատանեկան ֆիլմերի 13–րդ միջազգային փառատոնը: Փառատոնն իր դռները կբացի ինչպես հայ հասարակության, այնպես էլ աշխարհի տարբեր անկյուններից ժամանած հյուրերի առջև:

Փառատոնը կազմակերպել է Հայաստանի «Ռոլան Բիկով» հիմնադրամը՝ ՀՀ նախագահի և ՀՀ մշակույթի նախարարության աջակցությամբ: Փառատոնի միջազգային աջակիցներն են ՀՀ–ում Ֆրանսիայի, Ռուսաստանի և Գերմանիայի Դաշնային Հանրապետության դեսպանությունները:

Հայաստանի «Ռոլան Բիկով» հիմնադրամի նախագահ Նունե Մանուկյանն ընդգծեց, որ փառատոնը մշակութային, սոցիալական ու կրթական ծրագրերի յուրահատուկ հարթակ է:

«Այս տարի ֆիլմերի աննախադեպ քանակությամբ հայտեր են ստացվել: Շուրջ 57 երկրներից ստացված 950 ֆիլմերի հայտերից փառատոնի ծրագրում ընդգրկվել է 180 ֆիլմ: Փառատոնի ընթացքում ժյուրիի նախորդ տարվա ձևաչափը պահպանվել է՝ բացառապես երեխաներ և երիտասարդներ են աշխատելու: Մասնավորապես՝ «Խաղարկային ֆիլմեր» անվանակարգում ժյուրիի ներկայացուցիչներ կլինեն Լոռու մարզի Ալավերդի, Շնող, Վանաձոր և Թեղուտ համայնքների երեխաները: «Հանդիսատեսի համակրանք» անվանակարգի ժյուրիի կազմում կլինեն Գավառի մանկատան սաները, իսկ «Անիմացիոն ֆիլմեր» անվանակարգում՝ «Թումո» ստեղծարար տեխնոլոգիաների կենտրոնի երեխաները: «Ես իրավունք ունեմ» անվանակարգում էլ ժյուրիի կազմում ներգրավված են Հայաստանի ամերիկյան համալսարանի ուսանողները»,– փառատոնին ընդառաջ տեղի ունեցած ասուլիսի ժամանակ ասաց Նունե Մանուկյանը:

«Ռոլան Բիկով» հիմնադրամի նախագահը հայտնեց, որ համագործակցել են ՀՀ Պաշտպանության նախարարության հետ, ինչի արդյունքում ստեղծվել է նաև «Պատիվ ունեմ» ռազմահայրենասիրական ֆիլմերի անվանակարգը:

«Այս տարի այս անվանակարգի ժյուրիի կազմում կլինեն ոչ միայն Հայաստանի, այլ նաև Արցախի զորամասերի զինվորները: Այս անվանակարգը նպատակ ունի կինոյի միջոցով նպաստել զինվորների գաղափարական դաստիարակությանը, բանակի մարտական ոգու բարձրացմանը: Լավագույն հայրենասիրական ֆիլմերը օգոստոսից ի վեր արդեն իսկ ցուցադրվել են ոչ միայն Հայաստանի, այլև Արցախի զորամասերի զինվորների համար»,– նշեց բանախոսը:

Նա հավելեց, որ փառատոնի 5 օրերի ընթացքում ֆիլմերը կցուցադրվեն մասնավորապես «Մոսկվա» կինոթատրոնում, «Մոսկվայի տուն» մշակութագործարարական կենտրոնում, Թատրոնի և կինոյի պետական ինստիտուտում, Հայ–Ռուսական (Սլավոնական) համալսարանում, «Թումո» ստեղծարար տեխնոլոգիաների կենտրոնում: Ֆիլմերը կցուցադրվեն նաև Գավառում և Ալավերդիում:

Նունե Մանուկյանը շեշտեց, որ ցուցադրությունները կազմակերպվում են բացառապես բարեգործական սկզբունքով:

«Այս տարի փառատոնի շրջանակներում կշարունակվի արդեն ավանդական դարձած «Դու մենակ չես... Միասին կհաղթենք» հատուկ ծրագիրը: Այդ ծրագրի շրջանակներում փառատոնի հավատարիմ բարեկամ՝ ՌԴ «Ոսկե Օստապ» մրցանակի երկակի դափնեկիր, «Ոսկե խոյ» մրցանակակիր, «Երալաշ» մանկական հումորային հանդեսի գեղարվեստական ղեկավար Բորիս Գրաչևսկին կայցելի «Արաբկիր» բժշկական համալիր և հանդիպում կունենա բուժվող երեխաների հետ»,–ասաց Ն. Մանուկյանը՝ հավելելով, որ փառատոնի ընթացքում կցուցադրվեն նաև «Երալաշ» մանկական կինոամսագրի նոր համարներ:

«Փառատոնի փակման արարողությունը տեղի կունենա նոյեմբերի 11–ին «Մոսկվա» կինոթատրոնում: Այդ օրը կամփոփվեն կինոդիտումների արդյունքները, կհայտարարվեն մրցանակի արժանացած ֆիլմերը, հանդիսավոր կերպով կհանձնվեն գրան պրին և մրցութային անվանակարգերի մյուս մրցանակները: Կներկայացվեն նաև երաժշտական համարներ, ինչը հաճելի պահեր կպարգևի հայ հանդիսատեսին և հնարավորություն կտա հյուրերին ծանոթանալ մեր մշակույթին»,– եզրափակեց Ն. Մանուկյանը:

Շարունակությունը՝ «Փաստ» օրաթերթի այսօրվա համարում